Mang Utas Jeung Baraya Anyar

Mang Utas Jeung Baraya Anyar
ku Kebo Hideung


Wilujeng sumping, mangga kalebet
Nepangkeun abdi geni, sadidinten sok dilandi si kebo Hideung, kandang di Perum Mitra Batik Karsamenak Kawalu Tasikmalaya.

Dupi Neng Kokom kawit ti palih mana kitu? ayeuna nuju dimana? nomer henpon sabaraha?
Mangga waler anu gampil heula :)

Bilih bade noongan foto2 baraya millis tasik mangga tiasa ditoongan di dieu : http://urangtasik. multiply. com

"Tah Mang Utas aya baraya anyar, Neng nepangkeun anu di juru namina Mang Utas"
"Nepangkeun abdi kokom" saur Neng Kokom bari ngagelenyu imut bangun anu nyari.
"Ehmmm...abdi Utas." bari gep sasalaman
"Mang Utas...! tong lami-lami teuing atuh sasalaman teh, abdi oge hoyong kenalan atuh." cek si Bolot bari nepak leungeun Mang Utas anu keur ngeukeuweuk panangan Neng Kokom anu sakitu lemesna.

"Heuuhhh...aya ku angger maneh mah, teu kaop ari ningali kolot senang." tembal Mang Utas bari semu jamedud.

"Nepangkeun abdi Bolot, sadidinten abdi sok disebat Boby, tong sungkan-sungkan panggil we Kang Boby." cek si Bolot teu euleum-euleum bari ngajak sasalaman ka Neng Kokom

"Kokom..." tembal Neng Kokom bari gumujeng
"Ohhh...nami websitena ko.com ? Insya Allah Neng ke akang ngahajakeun amengan kana website Neng, dupi nami saha atuh Neng teh ?"

"Muhuuuun nami abdi teh Kokom Kang..!" tembal Neng Kokom bari angger imut.
"Oohh..Mumun. .sae nami teh neng, tradisional tapi kalem, malihan didieu oge aya anu namina Kebo Hideung."

"Sanes Mumun atuh Kang...tapi Kokom..!"
"Neng Kokom...ari cumarios sareng anjeuna mah kedah bari pepeta Neng." Mang Utas mairan

"Aduh...kumaha atuh nya?..abdi mah teu tiasa pepetana." waler Neng Kokom semu bingung
"Kieu neng upami bade nyebatkeun nami, kedah bari molotot socana, sok geura cobian, tangtos kahartoseun. " tembal Mang Utas

"Cikan urang cobian Kang, sok Kang sina naros deui ka abdi."

Mang Utas noel cangkeng si Bolot, tuluy nunjuk ka Neng Kokom.

"Kumaha Neng...leres nya nami teh Neng Mumun ?" tanya si Bolot bari gumasep
"Sok Neng waler bari molotot." cek Mang Utas bari pepeta
"Abdi mah Kokom... sanes Mumun...!!!! " tembal Neng Kokom bari molotot ka si Bolot

Atuh si Bolot reuwas teu aya dikieuna dipolototan kitu kunu geulis teh.
"Aeh..aeh... kunaon ieu teh Mang Utas, si Neng Mumun jiga ngambek ka kuring."

"heuh da maneh mah pikasebeleun. .anggur mah kaditu bejaan Teh Riska, aya baraya kituh." tembal Mang Utas bari pepeta

"Heug atuh kuring rek nyusulan Kang Aris...ngan bejakeun tah ka Neng Mumun, ari ngambek teh ulah bari popolotot kitu." tembal si Bolot bari ngaleos.

"Har..ari maneh Lot...lain Kang Aris...Teh Riska...kadenge teu..?"
"Ah..titatadi oge kadangu...kapanan Amang teh miwarang nyusulan Kang Aris."

"Heuuuuhhh.. .dasar nu burung, ngomong jeung maneh mah kudu make peureup..." tembal Mang Utas bangun nu geregeteun

"Heuplah Mang Utas..tong amarah kitu, isin tuh kapanan aya baraya anyar, anggur mah bageakeun ku tuangeun atanapi leueuteun, ieu mah kalahka dipapag kunu hog-hag pasea." cek si Riweuh bari ngiceupan Neng Kokom.

"Enya atuda Jang..uing mah gondok tah ngomong jeung si Bolot mah." tembal Mang Utas
"Muhun Mang tong saruana...keun we da si Kang Bolot mah, bawaana kawas kitu, maklumeun batur."

"Mangga atuh Neng Mumun..mangga geura calik ayeuna mah." cek si Riweuh bari gumasep
"Eh....sanes Mumun abdi mah, tapi Kokom..!"

"Tah nya..saruana maneh mah jeung si Bolot, eta teh Neng Kokom lain Mumun..!" tembal Mang Utas bari molototan ka si Riweuh

"Ohhh..punten atuh Neng, sugan teh raina Kang kebo Hideung..heheheh. " tembal si Riweuh

"Heuuuuuuuuhhh. .dasar maneh mah saruana talapungeun. "

"Tos ah..Kang..tong raribut, ayeuna mah anggur abdi kenalkeun ka baraya anu sanes." saur Neng Kokom motong obrolan Mang Utas.

"Oh..muhun Neng,..."
"Kokom Mang..sanes Mumun..!" cek si Riweuh motong
"Aeh...ari maneh, kapanan uing teh nyebut Muhun, lain Mumun...!"
"Sugan teh Mumun atuda.." tembal si Riweuh bari nyengir

"Mangga atuh baraya sadaya, sok geura karenalan, aya baraya anyar yeuh...sok kadarieu..kadarieu. ...!"

"Halah si Mang Utas mah, jiga keur dagang obat wae."

"Neng Kokom mangga nya si betah tumaninah di Millis Tasik, soklah bebas bade curhat, atawa naon wae mangga diantos ku Akang."

"Muhun Neng soklah bebas..bade ngigel oge." sambung si Riweuh

"Neng sanes kirang sono akang teh masih keneh aya hanca paculeun, mangga atuh dikantun heula, keun we pan tos aya Mang Utas, mangga we sing nyalse nya..." cek si Kebo

"Muhun atuh Kang mangga wilujeng, kahade dijalana ulah nyopet" tembal Neng Kokom bari ngagelenyu

"Ahh..Neng mah tiasa wae..janten isin akang..hehehehhe. ..manggga Assalamu'alaikum baraya...!"

Tamat