CEULEUKEUTEUK

NINCAK BANGKONG BUDUG.

Aa, Ii, jeung Uu bisa disebut bujang lapuk.
Sigana mah pédah tampangna jauh ka kasép, hideung jeung pinuh ku jarawat badag.
Hiji mangsa maranéhanana tatamba ka dukun nu katelah matih:

“Pasti maranéh daratang kadieu hayang gancang boga jodo”, dukun miheulaan.

Aa, Ii, jeung Uu ngarénjag, “Pasti dukun matih yeuh, geus nyaho kereteg hate kuring” jero haténa.

“Eu….eu….eu…. gen…gening mbah tos terang maksad kuring saparakanca?”
“Nya puguh atuh, da maranéh kaciri geus karolot, jaba garoréng patut deuih !”
“Jan…jan….janten…..”
“Geus ulah sedih. Ayeuna mah maranéh kudu meuntas leuweung Si Leugeut Teureup”
“Teras…”
“Tapi kudu peuting anu poék mongkléng buta rajin, poé Kemis kliwon, minggu hareup”
“Teras…”
“Omat ulah nincak bangkong budug”
“Upami nincak….”
“Lamun nincak, maranéh moal meunangkeun jodo anu geulis”

Kacaritakeun breng wéh meuntas leuweung geledegan téa.

Ditengah perjalanan:

“Kok…” sada bangkong katincak.
“Aaah…..aing nincak bangkong budug !” ceuk si Aa, “Pasti jodo aing teu geulis…”

Sababaraha menit saméméh tepi ka sisi leuweung:

“Kok….” Sada bangkong katincak deui.

“Sial ! Aing ogé nincak !, ceuk si Ii kukulutus.

Tungtungna maranéhanana tepi ka sisi leuweung isuk-isuk pisan.
Reg eureun di saung anu dituduhkeun ku dukun

“Aing teu nincak bangkong! Pasti jodo aing geulis pisan!”, ceuk si Uu bangun bungah naker

Di jero saung geus diuk mojang tiluan, anu dua goréng patut, anu hiji geulis pisan.

“Tah nu geulis pasti bagian aing”, ceuk si Uu bari ngadeukeutan si mojang geulis.
“Néng. Janten enéng téh jodo akang atuh nya, da akang mah teu nincak bangkong budug, dasar anugerah”
“Enya kang. Paingan atuh kuring tadi nincak bangkong budug, dasar musibah!”

Abah Téa.
Kang Deddy Setiawan

PT. Krama Yudha Tiga Berlian Motors - Jkt