CEULEUKEUTEUK

BOM

Pasukan koalisi keur patroli wanci reupreupan panon poé deukeut walungan Tigris .
Sakolépat manéhna ningali aya urang Iraq anu lumpat popoyongkodan anu brasna ka sisi walungan.
Si komandan pasukan koalisi maréntahkeun anak buahna moro si Iraq .

"Udag tah jelema nu lumpat ka walungan !", kitu meureun basa urangna mah.

Aya kana saparapat jamna, kakara anak buah si komandan pasukan koalisi balik deui,

"Lapor ! Jelema tadi mawa bom, tapi bitu di walungan ! "
"Gening teu kadéngé ka dieu ?"
"Sorana mah leutik komandan, tapi bauna.....ooooooo.", bari utah-utahan.

SENSUS

Petugas : " Kagungan putra sabaraha urang pa ? "
Ki Wastra : " Ké, mun teu salah mah aya kana 17 urangna ".
Petugas : " Euleuh seueur pisan. Ari piaraan ? "
Ki Wastra : " Ah encep mah. Ulah gareuwah nya ? Di Subang aya, di Kuningan aya, di Karawang aya , di...."
Petugas : " Éh, sanés piaraan éta, maksad téh piaraan ingon-ingon, sapertos domba, sapi, jsb"
Ki Wastra : " Oooh, sugan téh ujang nyaho rusiah kuring ".

SARUANA

Dikdik : " Cik, ménta rokona Dan ! "
Dadan : " Daék Jarum ? "
Dikdik : " Kajeun lah Jarum gé ! "
Dadan : " Daék sabatang ? "
Dikdik : " Enya lah tibatan haseum ! "
Dadan : " Daék meuli sorangan ku duit manéh ? "
Dikdik : " Mun titatadi, teu boga kituh ! Dasar siah...! "

Abah Téa.

Kang Deddy Setiawan

PT. KTB - Jakarta